Glosario
- Abono en conta
- É un ingreso, é dicir, a anotación dunha cantidade de cartos no haber dunha conta. Ese abono pode facerse en efectivo, por cheque, por transferencia...
- Acción
- Valor mobiliario que representa unha parte proporcional do capital social dunha sociedade. Quen ten accións é, por tanto, socio propietario dunha empresa en proporción á súa participación. O accionista é sempre o último en cobrar en caso de liquidación da compañía (despois dos traballadores, os acredores e os propietarios de bonos ou obrigas). Ver DIVIDENDO e DEREITO DE ASISTENCIA E VOTO.
- Accionista
- É o titular de accións, o co-propietario dunha empresa. Ver ACCIÓN.
- Accionista minoritario
- Termo utilizado para designar ao pequeno accionista en xeral, é dicir a aqueles accionistas que teñen escasa ou nula capacidade de influír na compañía (salvo que actúen de forma agrupada).
- Achega ou investimento mínimo
- Cantidade necesaria para poder adquirir ou investir por primeira vez en determinados produtos (bonos ou obrigas, fondos de investimento...).
- Acredor
- Persoa física ou xurídica a quen se lle deben cartos. O acredor ostenta un dereito de cobranza ou de crédito contra un debedor.
- Activo
- Desde o punto de vista dunha sociedade, os activos, son o conxunto dos seus bens (inmobles, mercadorías...) e dereitos de cobranza (o que lle deben).
- Activo financeiro
- Valor que acredita a titularidade de determinados dereitos económicos (accións, cartos en efectivo, depósitos, valores de renda fixa...).
- Activo fixo
- Tamén denominado inmobilizado. Está integrado polos bens e dereitos dunha empresa que non están destinados á venda, senón a asegurar o seu funcionamento e continuidade. Este tipo de activo caracterízase pola súa permanencia na empresa durante un período longo, normalmente superior a doce meses. Estes activos amortízanse durante toda a vida do ben.
- Activo sen risco
- Activo financeiro cun rendemento coñecido e certo, emitido por unha entidade ou organismo cunha capacidade para cumprir coas súas obrigas de pago da que non existen dúbidas. Tradicionalmente, o activo sen risco asóciase á débeda pública a curto prazo emitida polos países desenvolvidos (por exemplo, unha Letra do Tesouro).
